Angeun Lada

Budak awewe ngaranna nyi Kěpik, wanci ti beurang dadaharan jeung indungna, ngomong ka indungna: ěma, angeun lada teh hancer, kula mah teu beuki. Cek indungna: Ayeuna geura piceun bae, ngadadak ngangeun deui teu bisa, mangka bae dipanggodogkeun deui, dibungbuan mangka ngeunah. Sanggeus pada dadaharan, anakna nu awewe diajak ka tegal ngali huwi jeung ngala kacang, něpi ka surup panon powe, mupuna kacang jeung huwi meunang loba, pada diwadahan ku said; ari geus surup, baralik, tuluy pada dadaharan deui, angeun lada nu disebut hancer teya dicicikeun kana wadah sejen, nyi Kěpik ngasaan angeun, omongna: Lah iyeu ngeunah, sejen jeung nu dihakan ku kula basa ti beurang teya. Tuluy sarěgěp dadaharannana, indungna lemek bari seuri: eulis, angeun lada nu dipoyok hancer teya, basa nyatu ti beurang, nya eta; nu matak jadi ngeunah, sabab maneh měntas digawe, ngali huwi jeung mupu kacang di těgal.

Hartina iyeu dongeng: nu daek nyabak gawe, lamun dadaharan sagala ge ngeunah didahar, sabab ponyo.