Ciung Jeung Kutuk-Kutuk

Aya ciung abus kana parumpung, diarah ku kutuk-kutuk, tapi macokna atawa nyakarna kutuk-kutuk teh hanteu něpi, sabab jěro parungpungna. Ciung ngaděděmpes di jěro parungpung, kutuk-kutuk cicing ngadago di luwar, ngarah bijilna; ciung garetekeun, bijil napsuna, pok susumbar: eh tukang maehan, kumaha aing teh kudu sabar bae, ulah ngalawan ka maneh, heg rasakeun ku maneh, apěs-apěsna mata maneh sahiji bakal jadi wadal.

Sanggeus susumbar kitu, ciung teh tuluy bijil, kutuk-kutuk nyingkah api-api siyeun, ciung susumbar deui pokna: eh kutuk-kutuk masing ati-ati, ulah nyingkah. Kutuk-kutuk narajang, nyamběr deui ciung, diranggeum tuluy dibawa.

Hartina dongeng iyeu: lamun maneh diarah ku nu saluhureun maneh pangawasana, ari meunang keneh nyumput mah, montong dilawan, tina wawanen maneh tungtungna matak tiwas; upama bonteng ngalawan kadu, tangtu bontengna anu lěbur.