Manuk Garuda Jeung Gagak

Aya garuda tarik pisan panyambĕrna anak ĕmbe, diranggeum tuluy bae dibawa ngapung. Dina mangsa harita aya manuk gagak nyahuun, kabitaeun pisan nyeueung tingkahna garuda teya, pikirna gagak teh: Naha kami lamun nurutan cara kitu, mowal katurutan? Ari geus ngomong kitu, gagak teh nenjo ĕmbe badot, gagak hibĕr muluk pisan, ari ti luhur monteng ka handap cara garuda, gĕpruk gagak teh nyambĕr kana ĕmbe badot sarta diranggeum. Barĕng rek dibawa hibĕr, sukuna kapukĕt ku bulu susuri ĕmbe; geus teu bisa hibĕr, kaboro ku nu ngangon, gancang gagak teh dicĕkĕl diteukteukan jangjangna, tuluy dibikeun ka anakna, dipake karĕsĕpan budak. Carek anakna nu hiji: Bapa eta manuk naon? Carek bapana: Iyeu manuk teh hayangeun bisa nurutan garuda, tapi saäyeuna tetela yen manuk gagak.

Hartina: ulah wani-wani nyorang sagala kalakuan, nu teu pikajungjungeun ku awak maneh atawa ku tanaga maneh, sabab taya nu pinulungeun katiwasan jeung wiwirang maneh kajaba budi maneh, nu kudu ngira-ngira ngukur ka kujur nimbang ka awak.

__________