Manuk Jogjog Jeung Saweuy

Aya manuk jogjog beunang ku saweuy, sasambatna ngalěngis malar dipikarunya, menta ka luar; nu boga saweuy karunyaeun, geus aya pikirna rek dileupaskeun; pok deui bae manuk jogjog teh ngomong hayang geura heg dileupaskeun: Lamun kaula dileupaskeun, kaula sanggup ngicuk-gicuk manuk nu reya, supaya beunang ku saweuy, minangka jadi paněbus diri kaula. Wangsulan tukang nyaweuy: Hamo keuna pangolo maneh ka aing, ayeuna maneh geus tangtu dipaehan, tadina aing aya pikir watir ka maneh, sanggeus maneh tembong boga omong děngki ka batur, jadi aing geuleuh ka maneh.

Hartina; sanajan maneh meunang cilaka, ulah tinggal pikir kautamaän, aya ogé arěp-arěpeunnana, tina jalma dengki ka batur, supaya manehna salamět kajeun batur cilaka, tungtungna rek salamět oge hanteu tulus.