Nu Nyalin Adat

Agus Kusen bapana beunghar, jadi sakarěp-karěpna ki Kusen diturutkeun bae. Tina bawaning kacida pangalěmna, datang ka matak ngalunjak, ogoan. Tapi ki Kusen keur budak keneh, kaburu bapana maot, jadi ki Kusen sanggeus yatim, cicing di pamanna, dulur indungna, aya di pilěmburan matuhna. Ari tadina sok dahar ngeunah, ayeuna mah dahar salumbrahna bae, ari di dayeuh unggal-unggal peuting reya nu sukan-sukan, ari di pilěmburan sore-sore geus salasarean, hudangna isuk-isuk. Ki Kusen keur anyar mah ngarumas kacida ku panata urang lěmbur. Bareng geus lawas mah nyaho kana nu pimatakeun jadi kahadean, tadina ki Kusen gěringan, ulatna piyas jeung rěměn tatamba, barěng geus jeung pamanna, cagěr sarta rosa; nu matak rěměn ngomong kiyeu: Běněr paman ngangaranan tilu pěrkara nu matak jadi kahadean hirup, nya eta daek digawe, těměn-wěkěl, kira-kira jeung prayoga.